上月，任達華到中山出席活動時遇襲，被狂徒用刀刺傷右手及腹部，經兩次手術修復四隻手指被割傷的神經線後，已無大礙。
由他主演的電影《小Q》，將於本月中上映，當事人現正養傷，全面停工，未能出席餘下的電影宣傳活動。幸運地，EC Day於較早前跟華哥進了電影專訪，除了談及安排飾演小Q的狗拍檔「布丁」於開拍前進駐屋企，增進感情外，更透露自己如何老貓燒鬚，NG 40多次才拍成導演收貨的一個鏡頭。
摸黑的恐慌
為了演活《小Q》入面的視障人士角色，任達華開拍前到盲人學校，觀察視障人的日常生活，由於自己在這方面零經驗，華哥特意叫導師們不要教授任何生活技巧，然後蒙上眼睛，賞試摸黑走出門口：「真係會好恐慌，你會無晒方向，無晒東南西北座標，摸住牆行過走廊，又要聞吓房間有咩氣味去摸索出路，呢種感覺好真實，令我帶咗睇唔到嘅隱形眼鏡做李寶庭（電影角色的名字）時更加神似、入戲。」
安排「布丁」寄住三星期
任達華本身是愛狗之人，家中有飼養兩隻狗狗，深明同狗拍檔建立有愛的關係，對拍攝有好大幫助，於是在開拍前將拍檔「布丁」接到家中暫住三星期：「小狗同人一樣需要愛，如果你同狗狗無一啲聯繫，意思即係氣味無互相交接，因為狗狗嘅嗅覺好靈敏，如果你同佢身上無一啲氣味，佢係唔會跟你，同埋唔會同你好熟落。所以一定要由好陌生，慢慢變得相熟，就必須要同狗狗喺肌膚上，或者嗅覺上有互動，令我身上有一股佢哋嘅味道。」
突然有狗朋友到訪，華哥坦言家中的狗狗起初少不免會爭風呷醋：「當然有少少，不過我有同狗狗傾偈，話俾佢哋聽帶「布丁」返嚟，大家一齊生活，三隻狗狗其實都好融洽，當然最初幾日「布丁」都唔係好睬我，我同屋企啲狗狗一齊，佢就會行開，不過最後都能夠融洽一齊生活。」
最高記錄NG超過40次
小孩與寵物向來是拍電影大忌，尤其是後者，容易被小事如車聲、人聲分散注意力，節奏掌握又易有落差，華哥自言開拍期間無比的耐性是不能或缺的一環，也令這位影帝級人馬破紀錄地NG：「狗狗根本唔知道機械係乜嘢，而且節奏亦唔啱，多啲唔得，少啲亦唔得，拍戲時要充滿耐性，多啲同狗狗傾偈，等佢知道雖然已經做咗四次，但仍然要再做。佢會諗已經錫咗你四次，點解仲要再做嘅？最最最緊要唔好令狗狗緊張，要喺輕鬆，舒服嘅情況下進行拍攝。導演試過要求有啲鏡頭一take好長，想一次過見到狗狗同我嘅動態，但外在環境又影響到狗狗，每一take都拍超過二十次，最高紀錄試嗰次係拍我喺街上撞到架車，然後再繼續行，因為路線迂迴，比較長，破晒我記錄，take四十幾次先拍好！」
Edit: Helen Chan Art: Litman Ku
故事大綱
小Q自出娘胎便帶著與別不同的胎記。在Dr.Lo(林文龍 飾)家出生,未幾交給陳生(郭晉安飾)陳太(楊釆妮 飾)和女兒芷喬(劉楚恬、袁澧林 分飾小時及少女期)一家三又帶養,感情深厚。長大後由導盲犬訓練員Simon(羅仲謙 飾)悉心訓練,帶到名廚李寶庭(任達華 飾)家中配對,寶庭因失明導致脾氣暴躁,不單喝罵辭去教職替他打理甜品店的妹妹寶兒(梁詠琪飾),更三番四次趕走小Q,但受過嚴格導盲訓練的小Q依然不離不棄,任何情況下也以身護主,忠誠終於解開寶庭心結,促使他勇於開闊新生活,不以失明停步,繼續鑽研新甜品,一人一狗並浪蕩天涯!然而隨著小Q年紀漸大,寶庭急病,一人一狗如何面對無可避免的分離……
