92年的《家有囍事》可以說是賀歲片經典中的經典，除了主演粒粒巨星：哥哥（張國榮）、周星馳、張曼玉等，還有一幕幕膾炙人口的搞笑場口，令人印象難忘！
來到《家有囍事2020》，故事繼續以張智霖、張繼聰及黃百鳴為首的三兄弟為骨幹，他們不是普通人家，而是精通千術的業餘俠盜，其中過往甚少拍喜劇的Chi Lam，今次首肯參與演出，除了被四個字吸引，還有張繼聰，究竟他有什麼過人之處，吸引到Chi Lam今次非演不可呢？
同張繼聰有化學作用
這些年張智霖所拍的電影，角色多樣化，唯獨喜劇較少找上他，Chi Lam坦言從沒有懷疑自己的喜劇天份，只是這些戲類，有時對手比劇本還來得重要，沒遇上合適的拍檔，當事人寧願放棄演出，至於答應接拍《家有囍事2020》，就是發現對的拍檔已經出現！「聽到《家有囍事》四字已經充滿歡樂，亦係賀歲金漆招牌，加上確認有張繼聰參與，你哋都有見識過阿聰嘅喜感啦，我同佢幾有化學作用，大家亦都有共識，想拍多啲歡樂俾大家， 所以就拍咗今年呢套賀歲片。」
電影中Chi Lam、張繼聰同黃百鳴三兄弟精通千術，扮鬼扮馬自然唔少得，當中造型丈千奇百趣：醫生、護士、魔術師、兔女郎以至「任何仁」應有盡有，Chi Lam笑說導演「重男輕女」，變相埋位開工比起周秀娜、Dada（陳靜）等女藝人來得輕鬆。「男仔負責文藝 ，擺吓有型甫士已經ok，女仔就比較辛勞，負責動作、千術 ，當中有唔場口係埋身肉搏，要佢哋親身上陣。
打小人背足兩日稿
張繼聰飾演三兄弟中最細的游永馳，片中除了負責物流，最重要還是騷巨鵰兼曬肌肉。「套戲真係俾一家大細睇，只不過接呢套戲之前要演拳手，變到一身肌肉，收尾仲有少少肉，就喺呢套都騷吓！」
一身好武功，今次無用武之地，張繼聰反而被一場打小人考起，足足花了兩日時間去準備拍攝：「最辛苦係要打小人，而係用英文打小人，背都背咗 兩日，好大壓力，但就好開心，睇playback大家都會笑，可以帶正能量畀大家係好開心嘅事。」張繼聰說。
至於近年收起性感的周秀娜，今次為了一場動作不介意以大露背、只穿底褲示人，周秀娜說：「今次同陳靜做兩姊妹，佢賣腦我賣力。大露背都係因應劇情、唔刻意，拍嘅時候亦清場做足安全措施，唯一困難，係點樣打先可以捲得條毛巾靚啲。」
故事大綱︰
游永富（黃百鳴飾）、游永忠（張智霖飾）、游永馳（張繼聰飾）三兄弟表面是尋常人家， 實際為精通千術的業餘俠盜，所得款項會作慈善用途。機緣巧合下，三兄弟遇上了老千姊妹花：雷夢娜（周秀娜飾）及雷夢露（陳靜飾），原來雷氏姊妹亦為俠盜，大家惺惺相惜，姊妹花亦搬入游家互相照應。 在一次意外中，兩家人得知城中富商鱷魚譚（譚耀文飾）實為作惡多端的黑幫頭目，決定聯手佈局儆惡懲奸。鱷魚譚喜好為收藏鑽石，於是眾人打算利用將在香港展出的寶石「永恆之 星」引蛇出洞，但如何把受高度保護的「永恆之星」偷龍轉鳳正是行動中最困難之處。過程 中人人扮鬼扮馬，合作過程亦令眾人的感情得以火速滋長，為游家帶來了連環囍事 。
Edit │ Helen Chan
Art │ Winus Mui
