星演國際旗下新人梁樂童（Stephanie）首支單曲《心甘情願》今日發佈MV（https://www.youtube.com/watch?v=0zhJHMmcBZk），歌曲已登陸各大音樂平台。由HOY TV《就是青春》出道，24歲的梁樂童終於出新歌，歌曲開首一連串渾厚女低音，配合畫面上極之童顏的梁樂童，可謂反差萌滿分。
《心甘情願》為HOY TV現正熱播劇集《雲襄傳》香港版主題曲。《雲襄傳》由內地人氣偶像陳曉、毛曉彤等主演，根據方白羽新武俠系列小說《千門》改編，早前在內地啟播獲得了極高的關注和評價，被封為「武俠劇天花板」。今次HOY TV為全劇加上廣東話配音，再特別配上梁樂童主唱的《心甘情願》主題曲，務求令觀眾有全新感受。
MV日前拍攝正好遇著橫風橫雨，難怪梁樂童話「大家都笑我貴人出門招風雨，好彩等咗個幾鐘，終於出太陽。」MV 導演好細心，特別為畫畫了得的梁樂童度身訂製角色，MV故事講述梁樂童有個一齊畫畫的暗戀對象，導演亦為梁樂童安排一個靚仔男主角，梁樂童覺得對方似台劇偶像：「估唔到第一次拍 MV 除咗好興奮，仲好緊張要演戲，好耐冇試過比男生拖手，真係有種心如鹿撞的感覺，好彩都順利完成，導演仲笑就係要呢一種反應。」
梁樂童好開心第一次拍 MV 就遇上好好的幕後團隊，面對颱風天氣大家都好專業好細心，「好夢幻覺得自己好似個公主，得到大家的照顧愛錫，好鍾意自己的造型，好期待 MV 製成品，希望大家都會喜歡。」
